काठमाडौ, अषाढ १९ - नेपालले इस्ट टिमोरलाई दोस्रो लेगमा ५-० ले हराएर फिफा विश्वकप फुटबल-२०१४ छनोटको दोस्रो चरणको यात्रा शनिबार निश्चित गरेको छ । प्रतिद्वन्द्वीलाई पन्छाएर नेपालले विश्वकप छनोटको पहिलो चरण पार गरेको पहिलोपल्ट हो ।
नेपालले पहिलो लेगमा इस्ट टिमोरलाई २-१ ले पराजित गरेको थियो । त्यसैले समग्रमा नेपालको जित ७-१ को रह्यो । नेपालले विश्वकप छनोटको २६ वर्षे यात्रामा हात पारेको यो चौथो जित हो । तेस्रोपल्ट लगातार दुई खेलमा गोल गरेको नेपाल पहिलोपल्ट दुई खेलमा अपराजित रह्यो ।
यसअघि एक जित वा बराबरीलगत्तै नेपालले नतिजा सुम्पँदै आएको थियो । छैटौंपल्ट विश्वकप छनोटमा सहभागी नेपालले २६ खेलमा अहिलेसम्म ४ जित, २ बराबरी र २० हारको नतिजा बेहोरेको छ । त्यसमा २२ गोल गर्दै ८८ गोल खाएको छ ।
करिब १५ हजार दर्शकले भरिएको दशरथ रंगशालामा नेपालले अन्तिम ३४ मिनेटमा चार गोल गर्यो । फिफा वरीयतामा ५४ स्थानमुनिको प्रतिद्वन्द्वीविरुद्ध नेपालले चौथो मिनेटमै अग्रता लिएको थियो । इस्ट टिमोरका कोरेइयाले पेनाल्टी क्षेत्रमा जगजित श्रेष्ठलाई लडाएपछि रेप|mी ली मिन हुले नेपाललाई पेनाल्टीको मौका दिएका थिए ।
त्यसमा अनिलले गोल गर्दै नेपाललाई अघि बढाए । उनले पहिलो लेगमा पनि पेनाल्टीमा गोल गरेका थिए । राष्ट्रिय टिमका लागि १५ खेलमा उनको यो सातौं गोल हो । दोस्रो गोल भोला सिलवालको नाममा रह्यो । अनिलको पासमा इस्ट टिमोरका गोलकिपर डियामान्टिनो लियोङ र डिफेन्डर कोरेइयाको असमझदारीमा प्राप्त बलमा भोलाको फिनिसिङ उत्कृष्ट थियो ।
त्यसको ३ मिनेट नबित्दै जुमनु राईले करिअरको नवौं गोल गर्दै नेपाललाई ३-० ले अघि बढाए । विराज महर्जनको क्रसमा बल नियन्त्रण गर्दै उनले पेनाल्टी बक्स लाइनबाट सुन्दर गोल गरेका थिए । अनिल ओझाले ८९ औं मिनेटमा प्रहार गरेको बल गोलकिपर लियोङले फर्काए ।
त्यही रिबाउन्ड बललाई वान-टचमा पोस्टको दिशा दिई जगजितले चौथो गोल गरे । त्यसको एक मिनेट नबित्दै सब्स्िटच्युट सुजल श्रेष्ठले पाँचौं गोल गरे । एक डिफेन्डरलाई छक्याएर उनले सेकेन्ड बार च्याप्दै खेलकै उत्कृष्ट गोल गरे । जुमनुको स्थानमा ६४ औं मिनेटमा उनी मैदानमा छिरेपछि नेपालले उत्कृष्ट लय समातेको थियो ।
भोला, जगजित र सुजलले राष्ट्रिय टिमका लागि पहिलोपल्ट गोल गरेका हुन् । नेपाल प्राप्त थप ७ अवसरमा भने गोल गर्न असफल रह्यो । दोस्रो मिनेटमै सन्दीप राईले २५ यार्डबाट प्रहार गरेको पि|m-किक बल क्रसबारमा लागेर फर्केको थियो ।
'पहिलो हाफमा थुप्रै अवसरमा गोल गर्न सकेनौं,' नेपालका प्रशिक्ष्ाक ग्राहम रोबर्ट्सले भने, 'राम्रो गर्नेमा आत्मविश्वासी थियौं र राम्रो खेल पनि प्रस्तुत गर्यौं । एक-अर्कालाई बल पास दिए गोल हुन्छ भन्ने दोस्रो हाफमा प्रमाणित गर्यौं ।'
दर्शकको समर्थन र स्वदेशमै दुवै खेल खेल्ने मौकाले फाइदा पुर्याएको प्रशिक्ष्ाक रोबर्ट्सले बताए, 'अर्को चरणमा जोर्डनलाई पनि घरमा हामी हराउनेछौं ।' जोर्डन र नेपाल होम एन्ड अवेका आधारमा साउन ७ र १२ गते भिड्नेछन् । 'पहिलो खेलमा वषर्ाले गाह्रो भएको थियो,' नेपालका कप्तान सागर थापाले भने, '५-० को जितले हामी इस्ट टिमोरभन्दा राम्रो हौं भन्ने प्रमाणित गर्यौं ।'
'शारीरिक रूपमा हामी पछि थियौं र सुरुमै पेनाल्टी गोलले पछि परेकाले मानसिक रूपमा पनि तल पर्यौं,' इस्ट टिमोरका सहायक प्रशिक्षक मिगेल डे कोस्टाले भने, 'दुवै खेल नेपालमा खेल्नु समस्या रह्यो । नेपाललाई बधाई छ र अर्को चरणमा सफलता प्राप्त गर्नका लागि शुभकामना ।'
नेपाली टिम किरण चेम्जोङ (गोलकिपर), सागर थापा -कप्तान), रोहित चन्द, विराज महर्जन, विकाससिंह क्षेत्री, सन्दीप राई (शिव श्रेष्ठ-८२), भोला सिलवाल -अनिल ओझा-७२), जगजित श्रेष्ठ, नीराजन खड्का, जुमनु राई (सुजल श्रेष्ठ-६४) र अनिल गुरुङ ।
