तनहुँ, माघ १७ - शल्यक्रियापछि मृत्यु भएकी एक सुत्केरीको परिवारलाई डुम्रेस्थित लक्ष्मी अस्पतालले ५० लाख रुपैयाँ क्षतिपूर्ति दिएको छ । क्षतिपूर्तिको पहिलो किस्ताबापत १२ लाख ५० हजार बुधबार अस्पतालले पीडित परिवारलाई बझाएको हो । शल्यक्रियापछि छोरा जन्माएकी पुर्कोट ५ वाइसजाँगरकी ३२ वषर्ीया निर्मला श्रेष्ठको मंगलबार राति मृत्यु भएकाले अस्पताल प्रशासनले क्षतिपूर्तिबापत ५० लाख दिन सहमत भएको थियो । नवजात शिशुको अवस्था भने सामान्य छ । अस्पतालको लापरबाहीले श्रेष्ठको मृत्यु भएको भन्दै आफन्तले बुधबार अस्पताल प्रशासनमा धर्नासहित करिब १ घन्टा पृथ्वी राजमार्ग अवरुद्ध पारेका थिए । अस्पतालले क्षतिपूर्तिबापत माग गरेअनुसारको ५० लाख दिन सहमति जनाएपछि मृतकका आफन्तले विरोधका सबै कार्यक्रम फिर्ता लिएका छन् । श्रेष्ठले यसअघि तीन छोरी जन्माइसकेकी थिइन् । मृतकका श्रीमान् भीमलाल भने अर्धचेत अवस्थामा रहेको आफन्त हरिकृष्ण श्रेष्ठले बताए । उनले अस्पताल प्रशासनको लापरबाहीले आफन्तको ज्यान गएकाले करिब ३ हजार स्थानीय बासिन्दाले अस्पताल घेराउ गर्न बाध्य भएको बताए । उनले बाँकी ३७ लाख ५० हजार अस्पतालले ४ महिनाभित्र बुझाउने सहमति जनाएपछि आन्दोलन स्थगित गरेको जनाए । अस्पतालका प्रबन्धक परशुराम अधिकारीले मृतक श्रेष्ठको अप्रेसन गर्नुपहिले नै पाठेघर च्यातिएको अवस्थामा रहेकाले बचाउन नसकिएको बताए । उनले अस्पताल प्रशासनबाट कुनै कमजोरी नभए पनि वाइसजाँगरवासीले माग गरेअनुसार क्षतिपूर्ति दिन सहमत भएको बताए । 'हामीले बिरामीको उपचारमा कुनै कसुर बाँकी राखेका थिएनौं,' उनले भने, 'तर सुत्केरीलाई बचाउन सकिएन ।' उनले उपचारमा संलग्न चिकित्सकमाथि शंका नगर्न र जस्तोसुकै छानबिन गरिए पनि अस्पताल मान्न तयार रहेको बताए ।
मृत आत्मा लाइ शांति मिलोस हाम्रो पुर्कोट बासी सम्पूर्ण को तर्फ़ बाट हार्दिक समबेदना प्रकट गर्दछौ र शोकाकुल परिबार मा धर्यता को शक्ति मिलोस
Share
